བོད་ལྗོངས་མི་དམངས་ཀུན་ཁྱབ་རླུང་འཕྲིན་ལས་ཁུངས་ཁམས་སྐད་རླུང་འཕྲིན་འདི་བཞིན་སྤྱི་ལོ༢༠༠༡ལོའི་ཟླ་བ༡༠པའི་ཚེས༡ཉིན་དངོས་སུ་གཏོང་འགོ་ཚུགས་པ་དང་ཆབས་ཅིག་སྲུང་སྐར་ཐོག་ནས་བརྒྱུད་གཏོང་བྱས། སྐབས་དེ་དུས་ཁམས་སྐད་རླུང་འཕྲིན་རང་ངོས་ནས་བཟོས་པའི་ལེ་ཚན་བོད་ལྗོངས་གསར་འགྱུར་མཉམ་བསྒྲགས་ལེ་ཚན་ཆུ་ཚོད་ཕྱེད་ཀ་དང་། ཆེད་སྒྲིག་ལེ་ཚན་དེང་གི་བོད་ལྗོངས་ཞེས་པ་ཆུ་ཚོད་ཕྱེད་ཀ རིག་རྩལ་ལེ་ཚན་གསེར་གྱི་བྲོ་ར་ཞེས་པ་ཆུ་ཚོད་ གཅིག་བཅས་ལས་མེད་པ་དང་། དེ་མིན་གྱི་ལེ་ཚན་ཁག་ཀྲུང་དབྱང་རླུང་འཕྲིན་ལས་ཁུངས་ཀྱི་བོད་སྐད་ལེ་ཚན་དང་བོད་ལྗོངས་རླུང་འཕྲིན་ལས་ཁུངས་ཀྱི་བོད་སྐད་རླུང་འཕྲིན་ལེ་ཚན་བརྒྱུད་གཏོང་བྱས།

ཁམས་སྐད་རླུང་འཕྲིན་འདི་གཏོང་འགོ་བཙུགས་པ་ནས་བཟུང་སྔ་ཕྱི་བར་གསུམ་དུ་ཡང་དག་པའི་གླེང་ཕྱོགས་ཀྱི་ཁ་ཕྱོགས་རྒྱུན་འཁྱོངས་དང་། བློ་གཅིག་སེམས་གཅིག་གིས་མི་དམངས་མང་ཚོགས་ལ་ཞབས་འདེགས་ཞུ་རྒྱུ་གཙོ་བོའི་དམིགས་དོན་དུ་བཟུང་ནས་ཞིང་འབྲོག་མང་ཚོགས་ལ་རང་རེའི་ཏང་གི་བྱེད་ཕྱོགས་སྲིད་ཇུས་དང་། ལྷག་པར་དུ་དམངས་ཕན་སྲིད་ཇུས་དང་ཞིང་འབྲོག་ལས་སོགས་ཀྱི་ཚན་རྩལ་ཤེས་བྱ་སོགས་མདོར་ན་ཤེས་དཔལ་རིག་གསུམ་གྱིས་གཙོ་བོ་བྱས་པའི་རིགས་ཚན་ཁག་མི་ཚང་བ་མེད་པར་ངོ་སྤྲོད་ཞུ་བགྱི་ཡོད་པས་རྒྱ་ཆེའི་ཁམས་ཁུལ་གྱི་རླུང་འཕྲིན་གསན་པ་པོ་མང་པོའི་དགེ་མཆོག་གྲོགས་བཟང་ཞིག་ཏུ་གྱུར་ནས་ཁོང་ཚོའི་དགོས་མཁོ་བསྐོངས་དང་སྐོང་མུས་སུ་མཆིས།

ད་ལྟ་ཁམས་སྐད་རླུང་འཕྲིན་འདི་བཞིན་རླབས་འབྲིང་ཝ་སྟོང་ཚན༥༩༤ཐོག་ནས་གསན་བཞེས་ཐུབ་པ་དང་བོད་ཀྱི་ཆབ་མདོ་ས་ཁུལ་གྱིས་གཙོ་བོ་བྱས་པའི་དེའི་མཐའ་སྐོར་གྱི་ཁྱིམ་མཚེས་ཞིང་ཆེན་གྱི་ས་ཆ་ཁག་གཅིག་ལ་ཡང་གོ་ཐུབ་ཀྱི་ཡོད།

ང་ཚོའི་ལེ་ཚན་འདི་ཉིན་ལྟར་ཞོགས་པ་ཆུ་ཚོད་དྲུག་པའི་ཐོག་གཏོང་འགོ་བཙུགས་ཏེ་དགོང་མོ་ཆུ་ཚོད་བཅུ་གཉིས་ཐོག་ཉིན་གང་གི་རླུང་འཕྲིན་གཏོང་མཚམས་འཇོག་གི་ཡོད། ཉིན་གང་གི་རླུང་འཕྲིན་གཏོང་ཡུན་ཆུ་ཚོད་བཅོ་བརྒྱད་ཏག་ཏག་ཡིན། ད་ལྟ་ང་ཚོ་ཁམས་སྐད་རླུང་འཕྲིན་ལ་གསར་འགྱུར་ཚོ་ཆུང་དང་། ཆེད་སྒྲིག་ཚོ་ཆུང་། རིག་རྩལ་ཚོ་ཆུང་། གླིང་སྒྲུང་ཚོ་ཆུང་བཅས་ཆེད་དོན་ཚོ་ཆུང་ཁག་བཞི་ཡོད་པ་དང་ལས་དོན་མི་སྣ་ཁྱོན་བསྡོམས་ཉིས་ཤུ་རྩ་གཉིས་ཡོད།