ཨ་ཅག་རོལ་ཚོགས་ཀྱི་ཆེད་སྒྲིག་གསར་པའི་མདུན་ཤོག་པར་རིས།

བོད་རིགས་བུད་མེད་ཀྱིས་གྲུབ་པའི་རྒྱལ་ནང་གི་གླུ་ལེན་རོལ་ཚོགས་ཐོག་མ་སྟེ།   ཨ་ཅག་རོལ་ཚོགས་ཀྱིས་མི་འགྱངས་པར་ཆེད་སྒྲིག་བརྙན་འཁོར་གཉིས་པ་ཨ་ཅག་གི་མཇལ་འཛོམས་ཞེས་པ་འགྲེམ་སྤེལ་བྱ་རྒྱུ་ཡིན་ལ།  ད་ལྟ་ཆེད་སྒྲིག་དེའི་མདུན་ཤོག་གི་པར་རིས་དྲ་བ་བརྒྱུད་དེ་ཡོངས་སུ་བཀྲམ་ཡོད།

ཉིས་སྟོང་གསུམ་ལོར་ཁོ་མོ་ཚོ་དངོས་སུ་གར་སྟེགས་སུ་ཐོན་པ་ནས་བོད་རིགས་བུ་མོ་འདི་གསུམ་གྱིས་རོལ་མོའི་སྒྱུ་རྩལ་གྱི་ཉིང་བཅུད་རྨང་ནས་གཞིབ་མགོ་བརྩམས་ལ་དེའི་ཐད་རྔུལ་ཁྲག་གི་སེམས་ཤུགས་ཀྱང་མང་པོ་ཞིག་བཏོན་པ་རེད།  ད་ལོ་མི་འགྱངས་པར་ཚོང་རར་འགྲེམ་རྩིས་ཡོད་པའི་ཆེད་སྒྲིག་བརྙན་འཁོར་ཨ་ཅག་གི་མཇལ་འཛོམས་ཞེས་པའི་ནང་བསྡོམས་པས་གཞས་བཅུ་གཉིས་ཡོད་ལ། དེ་ནི་ཨ་ཅག་རོལ་ཚོགས་ཀྱིས་ཉེ་བའི་ལོ་འགའི་རིང་གླུ་གཞས་སྒྱུ་རྩལ་ལ་ཧུར་གྱིས་བརྩོན་སེམས་བསྐྱེད་པའི་འབྲས་བུ་རྡོག་རྡོག་ཅིག་ཀྱང་རེད།  གཞས་གསར་པ་འདི་རིགས་ཀྱི་སྒྲིག་སྦྱོར་ཚགས་ཞིབ་སྤུས་ལེགས་ཡིན་པས་དེས་རོལ་མོ་ནི་ནམ་ཡང་མིའི་རིགས་ཀྱི་འཚོ་བའི་ཁྲོད་ཀྱི་འཚོ་བཅུད་ཡིན་པ་བསྟན་ཡོད།  གཞན་བརྙན་འཁོར་གྱི་མདུན་རྒྱབ་ཀྱི་མཛེས་རིས་ཇུས་འགོད་ལ་ཕྱོགས་གཅིག་ནས་བབ་ཆགས་དང་ཅིག་ཤོས་ནས་དེང་རབས་ཀྱི་ཁྱད་ཆོས་སྨྲ་མི་ཤེས་པ་ཞིག་ཐོན་ཡོད།
རྒྱུས་ལོན་པའི་གནས་ཚུལ་ལྟར་ན།  ཆེད་སྒྲིག་བརྙན་འཁོར་དེའི་ནང་ཨ་ཅག་རོལ་ཚོགས་དང་ཁྲིན་ལུང་།  གནམ་ལྕགས་རོལ་ཚོགས་པ་སོགས་སྒྱུ་རྩལ་པ་དང་རོལ་མོ་བ་མང་པོ་ཞིག་དང་མཉམ་འབྲེལ་གྱིས་བླངས་པའི་གཞས་ཡོད་ལ།  ཆེད་སྒྲིག་བརྙན་འཁོར་དེ་ད་ལོའི་ལུགས་གསར་གྱི་ཟླ་བཅུ་གཅིག་པའི་ཟླ་མཇུག་ལ་རྒྱལ་ཡོངས་སུ་འགྲེམ་སྤེལ་བྱ་རྒྱུ་རེད།