ཉེ་དུས། རང་སྐྱོང་ལྗོངས་ཏང་ཨུད་ཀྱི་རྒྱུས་ལས་ཨུ་ཡོན། དྲིལ་བསྒྲགས་པུའི་པུའུ་ཀྲང༌། རང་སྐྱོང་ལྗོངས་ཕྱི་ཕྱོགས་རིག་གནས་སྤེལ་རེས་མཐུན་ཚོགས་ཀྱི་ཚོགས་གཙོ་ཚུལ་ཡུད་དབྱིང་གིས་ལྷ་སར་རང་ལྗོངས་སུ་གཟིགས་སྐོར་དང་བཅའ་འདྲི་གནང་བར་ཕེབས་པའི་ཧྥ་རན་སིའི་གསར་འགོད་པའི་ཚོགས་པ་དང་མཇལ་འཛོམས་གནང་བ་རེད།
ཚུལ་ཡུད་དབྱིང་གིས་རང་ལྗོངས་ཀྱི་གཞི་རྩའི་གནས་ཚུལ་དང་། དཔལ་འབྱོར་དང་སྤྱི་ཚོགས་གོང་འཕེལ་འགྲོ་ཚུལ་ངོ་སྤྲོད་མདོར་སྡུས་གནང་རྗེས་འཛམ་གླིང་ཐོག་མཚམས་སྦྱོར་ཚན་པ་མང་པོའི་གསར་འགོད་པས་བོད་ལ་དོ་འཁུར་ཆེན་པོ་བྱས་ནས། བོད་ཀྱི་གནས་ཚུལ་གཏོང་སྤེལ་མང་པོ་བྱས་ཡོད་པའི་ནང་དོན་དངོས་མཐུན་པའི་སྒོ་ནས་གནས་ཚུལ་གཏོང་སྤེལ་བྱས་པ་ཡོད་ལ་དོན་དངོས་དང་མི་མཐུན་པའི་གནས་ཚུལ་གཏོང་སྤེལ་བྱས་པ་ཡང་ཡོད་པས། ཧྥ་རན་སིའི་གསར་འགོད་པའི་ཚོགས་པས་ད་རེས་བཅར་འདྲི་ཞུ་རིང་གནས་ཚུལ་དངོས་ཤེས་རྟོགས་གཏིང་ཟབ་བྱེད་པ་དང༌། བོད་ལ་ངོས་འཛིན་གསལ་པོ་ཐུབ་པ་བྱས་ནས་ཇི་མ་ཇི་བཞིན་དང་གོང་འཕེལ་འགྲོ་བཞིན་པའི་བོད་ལྗོངས་འདི་ཉིད་ཧྥ་རན་སིའི་མི་དམངས་ལ་ངོ་སྤྲོད་བྱས་ནས། ཧྥ་རན་སིའི་མི་དམངས་ཀྱིས་ཀྲུང་གོའི་བོད་ལྗོངས་ལ་རྒྱུས་མངའ་དེ་བས་ཆེ་བ་ཡོང་བ་བྱེད་རྒྱུའི་རེ་བ་ཡོད་ཅེས་གསུངས་པ་རེད།
ད་རེས་ཧྥ་རན་སིའི་གསར་འགོད་པའི་ཚོགས་པ་ནི་ཧྥ་རན་སིའི་མཚམས་སྦྱོར་ཚན་པ་གཙོ་བོའི་གསར་འགོད་པ་དང་ཆེད་བསྒྲིགས་ལེ་ཚན་གྱི་རྩོམ་པ་པོ། མཁས་དབང་སོགས་ལས་གྲུབ་ཡོད་པ་དང་ཁོང་ཚོ་ཚང་མ་བོད་ལ་བཅར་འདྲི་ཞུ་བར་ཡོང་ཐེངས་དང་པོ་ཡིན་པས་ཁོང་ཚོས་བོད་ལ་དོ་འཁུར་ཆེན་པོ་བྱེད་ཀྱི་ཡོད། མཇལ་འཛོམས་གནང་སྐབས་གསར་འགོད་པས ༣ པའི ༡༤ དོན་རྐྱེན་དང་འགྲོ་བ་མིའི་ཐོབ་ཐང་གི་གནད་དོན། མི་རིགས་ས་ཁོངས་རང་སྐྱོང་ལམ་ལུགས། རིག་གནས་སྲུང་སྐྱོབ་སོགས་ཀྱི་སྐོར་འདྲིས་པ་དང་ཤེས་རྟོགས་བྱས་པ་རེད།།
