ཁག་བཞི་པ། རྟའུ་རྫོང་གི་སྨན་བཅོས་འཕྲོད་བསྟེན་བྱ་གཞག་གིས་དམངས་ལ་ཕན་བདེ་བསྐྲུན།
སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་རྟའུ་རྫོང་གིས་ཏང་དང་རྒྱལ་ཁབ་ཀྱིས་བོད་རིགས་ས་ཁུལ་དུ་འཛིན་པའི་དམིགས་བསལ་གཟིགས་སྐྱོང་སྲིད་ཇུས་ཀྱི་གོ་སྐབས་དམ་འཛིན་བྱས་ནས། རྒྱ་ཆེའི་ཞིང་འབྲོག་མང་ཚོགས་ཀྱི་བདེ་རྩར་ཐུག་པའི་ལས་དོན་རྒྱ་ཆེར་སྤེལ་བས་རྫོང་ཡོངས་ཀྱི་མང་ཚོགས་ལ་ཁེ་ཕན་ཆེན་པོ་ཐོབ་ནས་ཏང་གི་སྲིད་ཇུས་བཟང་པོའི་དྲོ་སྐྱིད་མྱོང་ཐུབ་པ་བྱུང་ཡོད་པ་རེད། ཞིང་འབྲོག་མང་ཚོགས་ལ་སྨན་བཅོས་བྱེད་རྒྱུ་ཡང་གཟིགས་སྐྱོང་སྲིད་ཇུས་ཀྱི་གྲས་ཤིག་ཡིན་པས། སྤྱི་ལོ ༢༠༠༧ ལོར་རྟའུ་རྫོང་དེ་ཉིད་ཐེངས་བཞི་པའི་གྲོང་གསེབ་ཀྱི་མཉམ་ལས་སྨན་བཅོས་ཚོད་ལྟ་བྱེད་སར་གཏན་འཁེལ་བྱས་པ་ནས་བཟུང༌། འབྲེལ་ཡོད་གོང་རིམ་སྡེ་ཚན་གྱིས་ཐུགས་འཁུར་དང་རྒྱབ་སྐྱོར་འོག་རྫོང་དེས་མཉམ་ལས་སྨན་བཅོས་ཚོད་ལྟའི་ལས་དོན་ཡག་པོ་སྒྲུབ་ཆེད་གཅིག་ནས་འགོ་ཁྲིད་ལ་ཤུགས་སྣོན་བརྒྱབ་པ་དང་དོན་འཁྱོལ་དམ་འཛིན་བྱས་པ། སྲིད་ཇུས་དམིགས་སར་འབྱོར་ཐུབ་པ་བཅས་བྱས་པ་དང༌། གཉིས་ནས་སྲིད་ཇུས་དྲིལ་བསྒྲགས་ཤུགས་ཆེར་བྱས་ནས་ཞིང་འབྲོག་མང་ཚོགས་ཀྱིས་སྲིད་ཇུས་ཤེས་རྟོགས་ཐུབ་ཚད་མཐོ་རུ་གཏོང་བ། གསུམ་ནས་འཆར་འགོད་ལེགས་བཅོས་བྱས་ནས་ཞིང་འབྲོག་མང་ཚོགས་རྣམས་མཉམ་ལས་སྨན་བཅོས་སུ་ཞུགས་པའི་ཁེ་ཕན་ཐོབ་ཚད་ཆེ་རུ་བཏང་བ། བཞི་ནས་དོ་དམ་དང་ལྟ་སྐུལ་ལ་ཤུགས་སྣོན་བརྒྱབ་ནས་ཐེབས་རྩ་བེད་སྤྱོད་ཡག་པོ་བཏང་བ་སོགས་ཀྱི་སྲིད་ཇུས་ལག་བསྟར་བྱས་པས་རྟའུ་རྫོང་ཁོངས་ཀྱི་མང་ཚོགས་ཁྲོད་འགོས་ནད་དང༌། ཡུལ་ནད། གཅོང་ནད་སོགས་ཀྱི་རྐྱེན་པས་དབུལ་པོར་འགྱུར་བའི་གནད་དོན་ཐག་གཅོད་ཐུབ་ཡོད་པ་རེད།
སྤྱི་ལོ ༢༠༠༧ ལོར་མཉམ་ལས་སྨན་བཅོས་ལམ་ལུགས་ལག་བསྟར་བྱས་པ་ནས ༢༠༠༩ ལོའི་བར་མཉམ་ལས་སྨན་བཅོས་ནང་ཞུགས་པའི་མི་གྲངས་དང་ཞུགས་ཚད་ལོ་རེ་བཞིན་མཐོ་རུ་སོང་ཡོད་པ་དང༌། ལོ་གསུམ་ནང་ཁྱོན་མ་དངུལ་སྒོར་ཁྲི་ཚོ ༨༣༡.༥༢ གྲབས་གསོག་བྱས་པ་དང༌། མཉམ་ལས་སྨན་བཅོས་ཐེབས་རྩ་ལས་རིམ་རྩིས་ལྟར་སྒོར་ཁྲི་ཚོ ༦༥༣.༣༦ བཏང་བས་རྫོང་ཡོངས་ཀྱི་མང་ཚོགས་ལ་ཁེ་ཕན་ཐོབ་ཚད་རིམ་རྩིས་ལྟར་ན་བརྒྱ་ཆ ༦༣ ལྷག་ཙམ་ཟིན་ཡོད་པ་རེད། སྤྱི་ལོ ༢༠༠༩ ལོར་མང་ཚོགས་མཉམ་ལས་སྨན་བཅོས་སུ་ཞུགས་ནས་སྨན་ཁང་དུ་སྡོད་པ་མི་ཐེངས ༣༦༣༦ ཟིན་པ་དང༌། སྤྱིའི་འགྲོ་གྲོན་སྒོར་ཁྲི་ཚོ ༦༨༢.༢༥ ཟིན་པ། སྨན་བཅོས་ཁ་གསབ་སྒོར་ཁྲི ༢༩༧.༨ སྤྲད་ཡོད་པ་རེད།
ད་ཆ་རྟའུ་རྫོང་རྫོང་ཨུད་དང་རྫོང་མི་དམངས་སྲིད་གཞུང་གི་ཡང་དག་འགོ་ཁྲིད་འོག་རྫོང་འཕྲོད་བསྟེན་ཅུས་ཀྱིས་ནུས་ཤུགས་གང་ཡོད་ཀྱིས། འཆར་འགོད་ལེགས་བཅོས་དང་སྒྲིག་གཞི་བཅོས་སྒྲིག ལམ་ལུགས་སྒྱུར་བཅོས་སོགས་བྱས་ནས་འཕྲོད་བསྟེན་ལས་དོན་འཕེལ་རྒྱས་ཀྱི་རྣམ་པ་བཟང་པོའི་འོག་རྫོང་ཡོངས་ཀྱི་ཞིང་འབྲོག་མང་ཚོགས་ལ་སྨན་བཅོས་འཕྲོད་བསྟེན་གྱི་ཞབས་འདེགས་ཞུ་བཞིན་ཡོད་པ་རེད།
