ཉིན་ཤས་གོང༌། ལྗོངས་ཡོངས་ཀྱི་སྐབས་བཅུ་པའི་ལུས་རྩལ་འགྲན་ཚོགས་ཀྱི་ལྗོངས་ཐད་གཏོགས་ལས་ཁུངས་ཀྱི་འཐུས་མི་ཚོགས་པའི་ལུས་རྩལ་པས་འགྲན་བསྡུར་གྱི་གྲ་སྒྲིག་ཧུར་ཐག་བྱེད་བཞིན་ཡོད་པ་རེད།
བུད་མེད་ཀྱི་ལན་ཆིའུ་སྤོ་ལོ་དང་ཕིང་ཕང་སྤོ་ལོ། མཆོང་རྒྱུགས་འཕེན་གསུམ་དང༌། སྐྱེ་པའི་རྐང་རྩེད་སྤོ་ལོའི་སྦྱོང་བརྡར་བྱེད་གནས་བཅས་ནས་གསར་འགོད་པས་ལུས་རྩལ་པ་ཚོས་ཆ་རྐྱེན་ཞན་པའི་ར་བའི་ཐོག་རྔུལ་ཆུ་ཁྲུམ་ཁྲུམ་དུ་འབབ་པའི་ངང་སྦྱོང་བརྡར་བྱེད་བཞིན་ཡོད་པ་མཐོང་བ་དང༌། ཁོང་ཚོས་བསམ་པའི་རྣམ་འགྱུར་ཡག་ཤོས་དང་དཔའ་ངར་ཆེར་སྐྱེས། སེམས་ཤུགས་ཆེ་ཤོས། འགྲན་བསྡུར་གྱི་ཆུ་ཚད་མཐོ་ཤོས་བཅས་ཀྱི་ཐོག་ནས་ལྗོངས་ཡོངས་ཀྱི་སྐབས་བཅུ་པའི་ལུས་རྩལ་འགྲན་བསྡུར་ལ་བསུ་བ་ཞུ་རྒྱུ་ཡིན་ཞེས་བཤད་པ་རེད།
ལྗོངས་ཐད་གཏོགས་ལས་ཁུངས་ཀྱི་འཐུས་མི་ཚོགས་པའི་ཚོགས་གཙོ་ཡས་ཤུན་ཀོའོ་ཡིས་གསར་འགོད་པར། ལྗོངས་ཐད་གཏོགས་ལས་ཁུངས་ཀྱི་འཐུས་མི་ཚོགས་པའི་ལུས་རྩལ་པ་ཡོངས་ཀྱིས་རྩལ་སློབ་དགེ་རྒན་གྱི་ཞིབ་ཕྲའི་མཛུབ་འཁྲིད་འོག་དཀའ་ངལ་སྣ་ཚོགས་ཁྱད་བསད་ཀྱིས་སྦྱོང་བརྡར་བྱས་ཏེ། ལུས་ཤུགས་སླར་གསོ་ཐུབ་པ་བྱས་ནས་འགྲན་བསྡུར་གྱི་ཆུ་ཚད་མཐོ་རུ་འགྲོ་བཞིན་ཡོད་པས་འཐུས་མི་ཚོགས་པ་ཁག་གི་ལུས་རྩལ་པའི་དབར་འགྲན་བསྡུར་བྱེད་སར་རྩལ་ནུས་ཡག་ཤོས་འདོན་རེས་བྱས་ཏེ། ལྗོངས་ཡོངས་ཀྱི་སྐབས་བཅུ་པའི་ལུས་རྩལ་འགྲན་ཚོགས་བདེ་བླགས་ངང་ལེགས་སྒྲུབ་ཡོང་ཆེད་སྟོབས་ཤུགས་ལེགས་སྐྱེས་འབུལ་རྒྱུ་རེད་ཅེས་གསུངས་པ་རེད།།
