ཁག་ལྔ་པ། འབར་ཁམས་རྫོང་གིས་འབྲོག་པའི་གཏན་སྡོད་ཁུལ་འཛུགས་སྐྲུན་བྱས་ཚུལ།
སྤྱི་ལོ ༢༠༠༩ ལོར་སི་ཁྲོན་ཞིང་ཆེན་ཏང་ཨུད་དང་སྲིད་གཞུང་གིས་འབྲོག་དམངས་གཏན་སྡོད་ཁུལ་ལག་བསྟར་འཆར་གཞི་གཏན་འབེབས་བཟོས་རྗེས། རྔ་བ་ཁུལ་འབར་ཁམས་རྫོང་གིས་སྔ་རྗེས་སུ་འབྲོག་དམངས་ཀྱི་གཏན་སྡོད་ཁུལ་ལག་བསྟར་འཆར་འགོད་དང༌། འབྲོག་དམངས་གཏན་སྡོད་ཁུལ་འཆར་གཞིའི་རྣམ་གྲངས་ལག་བསྟར་འཆར་འགོད། སྦྲ་གུར་གྱི་འཚོ་བ་གསར་པའི་ལག་བསྟར་འཆར་འགོད། གཏན་སྡོད་ཁུལ་འཛུགས་སྐྲུན་འཆར་འགོད་སོགས་ཆེད་དོན་ལག་བསྟར་འཆར་འགོད་ཁག ༡༡ བཏོན་ཡོད། སྤྱི་ལོ ༢༠༠༩ ལོའི་ཟླ་བ་དགུ་པ་ནས་འགོ་བཙུགས་ཏེ་ཤང་དང་གྲོང་བརྡལ་བདུན་གྱི་འབྲོག་པའི་གཏན་སྡོད་ཁུལ་ཁག་བདུན་གྱི་ཁྱིམ་དུད ༣༣༤ ཡི་སྡོད་ཁང་འཛུགས་སྐྲུན་ལག་བསྟར་བྱས་པ་ལོ་དེར་ཡོངས་སུ་ལེགས་གྲུབ་བྱུང་ནས། མི་གྲངས ༡༥༨༨ སྦྲ་གུར་ནས་སྡོད་ཁང་རྒྱ་ཆེ་ཞིང་དཀར་ཆ་དོད་པ་དང༌། ཁོར་ཡུག་གཙང་ཞིང་རྨང་གཞིའི་སྒྲིག་བཀོད་ཆ་ཚང་བའི་ཁང་པ་གསར་པའི་ནང་སྡོད་རྒྱུ་བྱུང་ཡོད་པ་མ་ཟད། གནས་སྤོ་བྱས་པའི་མང་ཚོགས་ཚོས་དེ་སྔོན་འཐུང་ཆུ་དཀོན་པ་དང༌། འགྲོ་བསྐྱོད་དཀའ་བ། སློབ་ཞུགས་དཀའ་བ། སྨན་དང་སྨན་པ་བསྟེན་དཀའ་བ། གློག་མེད་པ། ཆ་འཕྲིན་ཉན་འཇོག་དཀའ་བའི་གནད་དོན་ཐག་གཅོད་ཐུབ་ནས་ལོ་རྒྱུས་ཐོག་འཕྲད་པར་དཀའ་བའི་རྨི་ལམ་མངོན་འགྱུར་བྱུང་ཡོད་པ་རེད།
ཁང་གསང་ཤང་འབྲོག་ལས་གྲོང་ཚོ་ནི་འབར་ཁམས་རྫོང་གིས་སྤྱི་ལོ ༢༠༠༩ ལོར་གྲོང་ཚོ་བདུན་ལ་སྡོད་ཁང་གསར་རྒྱག་བྱས་པའི་གྲས་ཤིག་ཡིན་ཞིང༌། གྲོང་ཚོ་དེ་ཡོངས་ལ་ཁྱིམ་དུད ༥༥ དང་མི་གྲངས ༢༦༧ ཡོད་པ་དང༌། གྲོང་ཚོ་དེས་འབྲོག་ལས་ཁོ་ན་གཉེར་སྐྱོང་བྱེད་ཀྱི་ཡོད། རྒྱ་མཚོའི་ངོས་ལས་མཐོ་ཚད་སྤྱི་ཁྲེ ༣༢༠༠ ཟིན་པ་དང༌། འབར་ཁམས་རྫོང་གྲོང་བརྡལ་ནས་སྤྱི་ལེ ༡༢༧ ཙམ་ཡོད་པ་རེད། གསར་འགོད་པས་ཤེས་རྟོགས་བྱས་པར་གཞིགས་ན། སྤྱི་ལོ ༢༠༠༩ ལོའི་ཟླ ༩ པར་འབར་ཁམས་རྗོང་གིས་འབྲོག་པའི་གཏན་སྡོད་ཁུལ་དེ་འཛུགས་སྐྲུན་གྱི་ལས་འགོ་བརྩམས་ནས་དུས་ཐུང་ཟླ་བ་ལྔ་ཡི་ནང་འཛུགས་སྐྲུན་ཡོངས་སུ་ལེགས་གྲུབ་བྱུང་ནས་ད་ལྟ་གྲོང་ཚོ་གསར་པ་དེར་རང་བྱུང་གྲོང་ཚོ་གཉིས་ཀྱི་མང་ཚོགས་ཁུལ་དེར་འདུས་སྡོད་བྱས་ཡོད་པ་དང༌། གྲོང་ཚོ་འཛུགས་སྐྲུན་བྱེད་སྐབས་སྲིད་གཞུང་ནས་ཁྱིམ་དུད་རེར་སྒོར་ཁྲི་གཉིས་དང་ལྔ་སྟོང་རེ་སྡོད་ཁང་གསར་རྒྱག་གི་ཁ་གསབ་རོགས་དངུལ་དུ་སྤྲད་པ་དང༌། ཁྱིམ་དུད་མི་རེ་ངོ་རེར་ཉི་འོད་ནུས་པའི་ཆུ་ཚ་མོའི་ཡོ་ཆས་དང༌། རླུང་འཕྲིན་དང་བརྙན་འཕྲིན་ལྟ་ཉན་བྱེད་པའི་ཡོ་ཆས་སོགས་རིན་ཐང་མེད་པར་སྒྲིག་སྦྱོར་བྱས་ཡོད་ལ། གྲོང་ཚོར་བྱེད་སྒོའི་ལྟེ་གནས་ཡངས་ཤིང་རྒྱ་ཆེ་བ་ཞིག་བསྐྲུན་ཡོད་པ་དང༌། གྲོང་ཚོའི་བར་གསེང་དུ་གསང་སྤྱོད་གཅིག་དང་གད་སྙིགས་བླུགས་སའི་ཁུལ་གཅིག ལུས་རྩལ་ཡོ་ཆས་ཀྱི་རྣམ་གྲངས་སོགས་སྒྲིག་བཟོ་བྱས་ཡོད་པ་རེད།
གཞན་ཡང་འབར་ཁམས་རྫོང་གིས་ད་བར་གཏན་སྡོད་ཁུལ་ཁག་བདུན་འཛུགས་སྐྲུན་བྱེད་པར་ཁྱོན་མ་དངུལ་སྒོར་ཁྲི ༡༢༠༧ .༡ བཏང་ཡོད་པ་དང༌། ད་ལོ་འབྲོག་པའི་གཏན་སྡོད་ཁུལ་ཁག ༣༠ ལེགས་གྲུབ་བྱ་རྒྱུ་ཡིན་ཞིང༌། ད་ལྟ་གཏན་སྡོད་ཁུལ་འཛུགས་སྐྲུན་གྱི་ལས་དོན་ཚ་ཚ་འུར་འུར་ངང་སྤེལ་བཞིན་ཡོད་པ་རེད།
