ན་ནིང་དགུན་ཁ་དང་ད་ལོའི་དཔྱིད་ཀའི་ཚུན་དུ་རང་ལྗོངས་ཀྱི་ས་ཁུལ་མང་ཆེ་བར་གནམ་གཤིས་དྲོ་བ་དང༌ཆར་ཆུ་ཉུང་བ། རླུང་དམར་ཆེ་བ་བཅས་ཀྱི་སྣང་ཚུལ་ཐོན་ཡོད་པ་རེད། རྒྱལ་ཁབ་གནམ་གཤིས་ལྟེ་གནས་ནས་སྤྱི་ཚེས ༡༠ ཉིན་སྤེལ་བའི་རྒྱལ་ཡོངས་ཀྱི་ཐན་སྐྱོན་དང་ཞོད་སྐྱོན་ཁྱབ་ཚུལ་སྐོར་གྱི་པར་རིས་གསར་ཤོས་ལ་གཞིགས་ན། དེང་སྐབས་རང་ལྗོངས་ཀྱི་ནག་ཆུ་དང་གཞིས་རྩེ། ལྷ་ས། ལྷོ་ཁ་སོགས་ས་ཁུལ་དུ་ཚད་གཞི་མི་འདྲ་བའི་ཐན་པ་བསྟན་བཞིན་ཡོད་པའི་ནང་ནས་གཞིས་རྩེ་དང་ལྷ་ས། ལྷོ་ཁ་བཅས་ཡར་ཀླུང་གཙང་པོ་རྒྱུགས་ཁུལ་གྱི་ཞིང་ཁུལ་གཙོ་བོར་ཐན་པ་ཆེ་ཙམ་བསྟན་ཡོད་པས་འབྲེལ་ཡོད་ཚན་པས་འབྲོག་ལས་དང་ཞིང་ནང་དོ་དམ་ལ་ཤུགས་སྣོན་བརྒྱབ་ཏེ་ཐན་སྐྱོན་འགོག་བསེལ་གྱི་གྲ་སྒྲིག་ལས་དོན་ཡག་པོ་བསྒྲུབ་དགོས་ཀྱི་ཡོད་པ་རེད། དུས་ཡུན་རིང་པོར་ཆར་ཆུ་ཉུང་བ་དང༌དྲོད་ཚད་མཐོ་བ། ས་མཐོའི་ནུབ་ལྷག་ཆེ་བ་བཅས་ཀྱི་རྐྱེན་པས་ད་ལོ་དཔྱིད་ཀ་རང་ལྗོངས་སུ་ལྷག་པ་ཆེན་པོ་རྒྱབ་ཚད་མངོན་གསལ་དོད་པོས་མང་བ་ཡོད་པ་རེད། སྤྱི་ཟླ ༢ པའི་ཟླ་དཀྱིལ་དུ་ནག་ཆུ་དང༌གཞིས་རྩེ་སོགས་ས་ཁུལ་དང་ལྷ་ས་ཚུད་པའི་ཡར་ཀླུང་གཙང་པོ་རྒྱུག་ཁུལ་དུ་ལྷག་པ་ཆེན་པོ་བསྟུད་མར་རྒྱབ་ནས་ལྷག་པ་རྒྱག་ཚད་རིམ་པ ༡༡ ཟིན་པ་དང༌། སྤྱི་ཟླ ༢ པའི་ཚེས ༡༦ དང་ ༡༧ ཉིན་ལྷ་སར་ལོ་མང་བྱུང་མྱོང་མེད་པའི་ལྷག་པ་ཆེན་པོ་རིམ་པ ༩ རྒྱབ་པ་རེད། སྤྱི་ཟླ ༣ ནི་རང་ལྗོངས་སུ་ལྷག་པ་ཆེན་པོ་རྒྱག་པའི་ནམ་དུས་ཡིན་པ་དང༌། ས་ཁུལ་ཁག་ཏུ་ལྷག་པ་ཆེན་པོ་རྒྱག་པ་དང་བྱེ་རླུང་འཚུབ་རྒྱུ་ཡིན་པས་ཕྱི་རོལ་དུ་བཀལ་བའི་ཅ་དངོས་དང༌བརྡ་ཁྱབ་བྱང་བུ་ཆེ་གྲས། སྟབས་བདེའི་ཁང་པའི་ཐོག འགྱིག་ཤོག་དྲོད་ཁང་བཅས་ཀྱི་སྒྲིག་བཀོད་བརྟན་དུ་གཏོང་རྒྱུར་ཡིད་གཟབ་བྱེད་དགོས་ཀྱི་ཡོད་པ་རེད།།
