ཁག་གསུམ་པ། འཛམ་ཐང་བར་མ་ཤང་གིས་གྲུམ་བུ་ཚིགས་ཆེན་གྱི་ནད་ཕོག་པའི་མང་ཚོགས་གནས་སྤོ་བྱས་པ།
སི་ཁྲོན་ཞིང་ཆེན་རྔ་བ་བོད་རིགས་འཇང་རིགས་རང་སྐྱོང་ཁུལ་འཛམ་ཐང་རྫོང་གིས་དམངས་ཀྱི་བསམ་བློ་གཏོང་སར་བསམ་བློ་གཏོང་བ་དང་དམངས་ཀྱི་སེམས་ཁྲལ་བྱེད་སར་སེམས་ཁྲལ་བྱེད་པའི་ཏང་གིས་མང་ཚོགས་ལ་འཛིན་པའི་རྩ་དོན་གཞིར་བཟུང༌། མང་ཚོགས་ལ་ཁེ་ཕན་སྒྲུབ་པའི་ལས་དོན་འབོར་ཆེན་བསྒྲུབ་པས་མང་ཚོགས་ལ་ཕན་པ་ཆེན་པོ་ཐོབ་ཡོད་པ་རེད།
འཛམ་ཐང་བར་མ་ཤང་ནི་འབྲོག་ལས་གཙོ་བོར་བྱེད་པའི་ས་མ་འབྲོག་ཁུལ་གྱི་ཤང་ཞིག་ཡིན་ཞིང༌། ཤང་དེ་འཛམ་ཐང་རྫོང་གི་གྲུམ་བུ་ཚེགས་ཆེན་གྱི་ནད་གཞི་འབྱུང་ཁུལ་གཙོ་བོ་ཞིག་ཡིན་པ་དང༌། སྤྱི་ལོ ༢༠༠༨ ལོ་ནས་འགོ་བཙུགས་ཏེ་གྲུམ་བུ་ཚེགས་ཆེན་གྱི་ནད་གཞི་ཕོག་ཁུལ་འཛམ་ཐང་གྲོང་ཚོ་དང་ཡིད་དགེ་སྨད་མདོ་གྲོང་ཚོ། ཚ་ཐང་གྲོང་ཚོ་གསུམ་ནས་ཁྱིམ་དུད ༣༢༣ དང་མི་གྲངས ༡༣༨༣ འཐུང་ཆུ་སོགས་གཟུགས་གཞིར་མི་གནོད་པ་དང་ཆ་རྐྱེན་བཟང་བའི་ས་ཆར་གནས་སྤོ་བྱས་པ་ན་ནིང་ཡོངས་སུ་ལེགས་གྲུབ་བྱུང་ཡོད་པ་རེད། ཤེས་རྟོགས་བྱས་པར་གཞིགས་ན་གནས་སྤོ་བྱས་པའི་ཁང་པ་བརྒྱབ་པར་སྤྱིའི་རྒྱ་ཁྱོན་རྨིད་ངོས་སྙོམས་གྲུ་བཞི་མ ༢༩༥༢༠ ཟིན་པ་དང༌། རྫོང་སྲིད་གཞུང་ནས་ཁྱིམ་དུད་རེར་སྡོད་ཁང་གསར་རྒྱག་བྱེད་སྐབས་མ་དངུལ་སྒོར་ཁྲི་གསུམ་དང་སྟོང་ཕྲག་ལྔ་ཁ་གསབ་སྤྲད་པ་དང༌། ཁ་གསབ་ཀྱི་མ་དངུལ་སྤྲད་པ་ཁྱོན་སྒོར་ཁྲི་ཚོ ༡༡༣༠.༥ ཟིན་ཡོད་པ་རེད།
འཛམ་ཐང་རྫོང་གིས་གནས་སྤོ་བྱས་པའི་ཁུལ་དུ་མང་ཚོགས་ཀྱི་ཐོན་སྐྱེད་དང་འཚོ་བའི་ཆ་རྐྱེན་བཟང་དུ་གཏོང་ཆེད། ཤང་གི་སྲིད་དབང་འཛུགས་སྐྱོང་དང་གྲོང་ཚོའི་འཕྲོན་བསྟེན་ཁང་བསྐྲུན་པ། སློབ་གྲྭ་རྒྱག་པ། འབྲུ་རིགས་ཚོང་ཁང་སོགས་གསར་རྒྱག་བྱས་པ་མ་ཟད། གྲོང་ཚོའི་ལམ་བཟོས་པ་དང་ཆུ་རྫིང་བསྐྲུན་པ། ཟམ་པ་རྒྱག་པ། སྤུས་ཚད་ལེགས་པའི་འཐུང་ཆུ་འདྲེན་པ་སོགས་རིགས་འདྲ་མིན་གྱི་གྲོང་ཚོའི་རྨང་གཞིའི་སྒྲིག་བཀོད་འཛུགས་སྐྲུན་བྱས་པར་ཁྱོན་མ་དངུལ་སྒོར་ཁྲི ༦༠༠༠ ལྷག་ཙམ་བཏང་ཡོད་པ་རེད།
གསར་འགོད་པས་གནས་སྤོས་གཞིས་ཆགས་ཁུལ་ནས་མཐོང་ཐོས་བྱུང་བར་གཞིགས་ན་གྲོང་ཚོ་གསུམ་ནས་གནས་སྤོ་བྱས་པའི་གཞིས་ཆགས་གྲོང་གསར་ཁུལ་དེར་འདྲེན་པའི་འཐུང་ཆུ་གཙང་ཞིང་མི་གནོད་པ་དང༌། གྲོང་ཚོར་གློག་དང་ལམ་སོགས་རྨང་གཞིའི་སྒྲིག་བཀོད་ཆ་ཚང་བ་མ་ཟད། ཁོར་ཡུག་རྒྱ་ཆེ་ཞིང་གཙང་སྦྲ་དོད་པ་དང་སྡོད་ཁང་གི་ཆ་རྐྱེན་ལེགས་པ། མཁོ་དགོས་ཀྱི་ཅ་ལག་ཉོ་སྒྲུབ་སླ་བ། བུ་ཕྲུག་སློབ་གྲྭར་འགྲོ་བར་སྟབས་བདེ་བ། སྨན་བཅོས་འཕྲོད་བསྟེན་གྱི་ཆ་རྐྱེན་འཛོམས་པ་མ་ཟད། གྲོང་ཚོར་གཟུགས་པོ་སྦྱོང་བརྡར་བྱེད་སའི་ཡོ་ཆས་སྒྲིག་བཟོ་བྱས་པ་སོགས་དགོས་ངེས་ཀྱི་ཆ་རྐྱེན་འཛོམས་པོ་ཡོད་པ་རེད།
ད་ཆ་གནས་སྤོ་བྱས་པའི་གྲོང་ཚོའི་མང་ཚོགས་རྣམས་སྤྱི་ཚོགས་རིངལུགས་ཀྱི་མེས་རྒྱལ་ཁྱིམ་ཚང་ཆེན་མོའི་དྲོ་སྐྱིད་ཁྲོད་དུ་དེང་རབས་ཅན་གྱི་འཚོ་བ་ལོངས་སྤྱོད་བྱེད་བཞིན་མ་འོངས་པའི་ཕ་ཡུལ་དེ་བས་མཛེས་སྡུག་ལྡན་པ་བསྐྲུན་ཕྱིར་འབད་འབུངས་ལྡབ་བརྒྱ་བྱེད་བཞིན་ཡོད་པ་རེད།།
