ཉེ་དུས། སྤྱི་ལོ ༢༠༡༠ ལོའི་ལྗོངས་ཡོངས་ཀྱི་སློབ་བསྡུའི་ཡིག་རྒྱུགས་ལས་དོན་ཚོགས་འདུ་ལྷ་སར་འཚོགས་པ་དང༌། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ། རང་སྐྱོང་ལྗོངས་སློབ་བསྡུ་ཨུ་ཡོན་ལྷན་ཁང་གི་ཀྲུའུ་རེན་མོང་ཏི་ལིས་ཚོགས་འདུའི་ཐོག་རིམ་ཁག་སློབ་གསོ་ཚན་པ་དང་སློབ་བསྡུ་ལས་ཁུངས། མཐོ་རིམ་སློབ་གྲྭ་བཅས་དང་སློབ་བསྡུའི་ཡིག་རྒྱུགས་ལས་དོན་པ་ཡོངས་ཀྱིས། མི་དམངས་བློ་ཡིད་འཚིམས་པ་བྱེད་རྒྱུ་དམིགས་ཡུལ་དུ་འཛིན་པ་དང༌། འདྲ་མཉམ་དྲང་བཞག་གིས་ལྟེ་བ་བྱེད་པ། ཆ་འཕྲིན་ཡོངས་བསྒྲགས་ཀྱིས་གཙོ་གནད་བྱེད་པ་བཅས་བྱས་ཐོག་ཡིག་རྒྱུགས་ཀྱི་བདེ་འཇགས་དང་དོ་དམ་ལ་དམ་འཛིན་ནན་པོ་བྱས་ཏེ། ཡིག་རྒྱུགས་ཁོར་ཡུག་རྒྱུན་ཆད་མེད་པར་ཡག་ཏུ་གཏོང་བ་དང༌། ཆ་འཕྲིན་ཡོང་བསྒྲགས་བྱེད་ཤུགས་འཐུས་སྒོ་ཚང་དུ་གཏོང་བ་དང་། ཉི་འོད་ལས་གཞི་ཁྱོན་ཡོངས་ནས་ལག་བསྟར་བྱས་ཏེ་ཡིག་རྒྱུགས་བསྒྱུར་བཅོས་ལ་སྐུལ་འདེད་བརྟན་པོ་གཏོང་བ། དེང་རབས་ཅན་གྱི་ལག་རྩལ་བྱ་ཐབས་བཟུང་སྟེ་ལས་ཆོད་དང་དོ་དམ་སྤུས་ཚད་སྔར་བས་མཐོ་རུ་གཏོང་བ་བཅས་མ་ཟད། ཏན་ཏན་ཏིག་ཏིག་གི་སྤྱོད་ཚུལ་ཐོག་ནས་སློབ་བསྡུའི་སྒྲིག་འཛུགས་འགོ་ཁྲིད་དང་དོ་དམ་འགན་སྲུང་གི་ལས་དོན་ཡག་པོ་སྤེལ་ཏེ། ཚད་གཞི་མཐོ་པོ་དང་སྤུས་ཚད་མཐོ་པོའི་སྒོ་ནས་ད་ལོའི་སློབ་བསྡུའི་ཡིག་རྒྱུགས་ལས་འགན་ལེགས་སྒྲུབ་བྱེད་དགོས་ལ། སློབ་བསྡུའི་ལས་ཀ་དེ་བས་དྲང་བཞག་ཡོང་བ་བྱས་ཏེ་སྤྱི་ཚོགས་དེ་བས་བློ་ཡིད་འཚིམས་པ་བྱེད་དུ་འཇུག་དགོས་པའི་མཛུབ་སྟོན་གནང་བ་རེད།།
