སྤྱི་ལོ ༢༠༠༩ ལོར། རང་ལྗོངས་ཀྱི་རིམ་ཁག་བུད་མེད་མཉམ་འབྲེལ་ལྷན་ཚོགས་ཀྱིས་ཡོངས་ཁྱབ་ངང་ཤིང་འཛུགས་དང༌གསོ་སྤེལ། ལག་ལས་འཁེལ་འཐག ཁ་ལོ་བའི་ལག་རྩལ། ངལ་ནུས་ཕྱིར་གཏོང༌། སྲོལ་རྒྱུན་གྱི་ཚོས་རྒྱག་པ། ཀོ་པགས་ལས་སྣོན་སོགས་ལག་ཤེས་བཟོ་རྩལ་ལ་བརྟེན་ནས་རྩལ་ནུས་སྦྱོང་བརྡར་འཛིན་གྲ་ཐེངས ༣༥༤ གཉེར་ཏེ་བུད་མེད་མི་གྲངས་ལྔ་ཁྲི་ལྔ་སྟོང་ལྷག་ཙམ་ལ་སྦྱོང་བརྡར་སྤྲད་པ་དང༌། བུད་མེད་མི་ཐེངས་ཁྲི་ཚོ་བཅུ་གསུམ་སྒྲིག་འཛུགས་ཀྱིས་ངལ་ནུས་ཕྱིར་གཏོང་བྱས་ནས་ཡོང་འབབ་སྒོར་དུང་ཕྱུར་གཅིག་དང་ཁྲི་ཚོ་དགུ་སྟོང་ཙམ་གཏོད་ཡོད་པ་རེད། རང་ལྗོངས་ཀྱིས་ན་ནིང་རྩལ་ནུས་སྦྱོང་བརྡར་བརྟེན་གཞི་ལྔ་གསར་སྐྲུན་བྱས་ནས་སྦྱོང་བརྡར་མ་དངུལ་སྒོར་ཁྲི་ཚོ ༡༢༧ ལྷག་ཙམ་རག་ཐབས་དང་དོན་འཁྱོལ་བྱས་ཡོད་པ་རེད།
རང་སྐྱོང་ལྗོངས་བུད་མེད་མཉམ་འབྲེལ་ལྷན་ཚོགས་ཀྱིས་ཁེ་ལས་ལ་རྟེན་ནས་མཉམ་འབྲེལ་ཐོག་ཞིང་འབྲོག་ཁུལ་གྱི་བུད་མེད་ལ་གནས་གཏན་འཁེལ་གྱིས་སྦྱོང་བརྡར་ཐེངས་དང་པོ་སྤྲད་དེ་སྦྱོང་བརྡར་དང༌རྒྱུག་ལེན། ལས་གནས་ཐོག་སྐྱོད་པ། ལས་ཞུགས་བཅས་ཡུག་གཅིག་ཏུ་སྒྲིལ་བའི་ཞབས་ཞུ་བྱས་ནས་ཞིང་འབྲོག་བུད་མེད ༡༣༠ ས་གནས་རང་ཁོངས་སུ་ལས་ཞུགས་ཐུབ་པ་བྱས་ཡོད་པ་རེད། དེ་དང་དུས་མཚུངས་རང་སྐྱོང་ལྗོངས་བུད་མེད་མཉམ་འབྲེལ་ལྷན་ཚོགས་ཀྱིས་འབྲེལ་ཡོད་ཚན་པ་དང་གཞོགས་འདེགས་བྱས་ནས་སྤྱི་ལོ ༢༠༠༩ ལོའི་ལས་ཞུགས་ཞབས་ཞུའི་བྱེད་སྒོ་རབ་དང་རིམ་པའི་ཇུས་གཞི་བཟོས་ཏེ་དཔྱིད་ཀྱི་རླུང་བུའི་ལས་གནས་གཏོད་པའི་བྱེད་སྒོ་སྤེལ་བ་དང༌། བུད་མེད་ལས་ཞུགས་ཀྱི་ཆེད་དོན་གདན་ཞུའི་ཚོགས་འདུ་འཚོགས་ནས་བུད་མེད་ངལ་རྩོལ་པ་དང་གྲོང་གསེབ་ཀྱི་ངལ་ནུས་ལྷག་མ་སོགས་ལ་ཁྱོན་ལས་གནས ༦༠༠ ལྷག་ཙམ་བཀོད་སྒྲིག་བྱས་ཡོད་པ་རེད།།
