སློབ་ཚན་བཅུ་པ། རྣམ་དབྱེ་དང་པོ་དང་འབྲེལ་བའི་སླར་བསྡུ་བཤད་པ།

གོང་དུ་བཤད་པའི་རྣམ་དབྱེ་དང་པོ་དེའི་རྗེས་སུ་རྣམ་དབྱེ་གཉིས་པ་བཤད་ན་འོས་མོད། རྣམ་དབྱེ་དང་པོའི་རྗེས་སུ་གོ་སོགས་སྦྱར་ན། དེ་དང་འབྲེལ་བ་ཞིག་ཡིན་པས་དེ་དང་འབྲེལ་བ་ཡང་ཞར་ལ་སླ་མོར་ཤེས་ཕྱིར་མཚམས་འདིར་སླར་བསྡུ་བཤད་རྒྱུ་ཡིན། རྗེས་འཇུག་གི་ཡི་གེ་བཅུ་པོ་ལ་ན་རོ་སྦྱར་བ། གོ་ངོ་དོ་ནོ་བོ་མོ་འོ་རོ་ལོ་སོ་རྣམས་དང་། ད་དྲག་གི་རྗེས་སུ་ཏོ་ཡིག་བཅས་བསྡོམས་པས་བཅུ་གཅིག་པོ་དེ་ལ་སླར་བསྡུ་ཟེར་བ་ཡིན། དེ་རྣམས་མིང་མཐར་སྦྱོར་ཚུལ་ནི། རྗེས་འཇུག་རང་འདྲའི་རྗེས་སུ་སྦྱོར་བ་ཡིན་ཏེ་རྗེས་འཇུག་གའི་རྗེས་སུ་གོ་དང་ངའི་རྗེས་སུ་ངོ་ཞེས་རིམ་བཞིན་སྦྱོར་བ་ཡིན། ད་དྲག་གི་རྗེས་སུ་ཏོ་སྦྱོར་བ་ཡིན་ནོ། དེ་རྣམས་དོན་ལ་སྦྱོར་ཚུལ་ནི། དཔེར་ན། མཆོག་གོ མང་ངོ་། ཡོད་དོ། ཡིན་ནོ། ཐོབ་བོ། འཛོམ་མོ། དགའ་འོ། འགྱུར་རོ། བསྒྲིལ་ལོ། ཤེས་སོ། གྱུར་ཏོ་ཞེས་པ་ལྟ་བུ་དང་། ཡང་ན། ང་ཚོའི་སློབ་གྲྭ་མཆོག་གོ སློབ་མ་ཧ་ཅང་མང་ངོ་། ཀུན་ལ་ཡོན་ཏན་ཡོད་དོ། སློབ་ལ་བརྩོན་པ་ཡིན་ནོ། ཀུན་གྱི་དགའ་བསུ་ཐོབ་བོ། སློབ་སྦྱོང་ཁོ་ཆས་འཛོམ་མོ། ཐམས་བཅད་ཤིན་ཏུ་དགའ་འོ། སྤྱོད་ངན་རྩ་ནས་འགྱུར་རོ། སྟོབས་ཤུགས་གཅིག་དོར་ཏུ་བསྒྲིལ་ལོ། གནས་ལུགས་ཐམས་བཅད་ཤེས་སོ། དགེ་རྒན་དགའ་བར་གྱུར་ཏོ་ཞེས་པ་ལྟ་བུའོ།།

དེ་ལ་སླར་བསྡུ་ཟེར་དོན་ནི་མིང་དེའི་རང་གི་རྗེས་སུ་དེ་མ་ཐག་ཏུ་སླར་ཡང་ཚིག་གྲོགས་འབྱུང་བ་བསྡུ་བ་ནས་སླར་བསྡུ་ཟེར། མིང་གཞན་ཟླ་སྡུད་དང་རྫོགས་ཚིག་ཀྱང་ཟེར། ཚིག་གི་ཟླ་བོ་སྟེ་ཚིག་གྲོགས་སྡུད་པར་བྱེད་པས་ན་ཟླ་སྡུད་དང་སྐབས་དོན་དེ་གནས་སྐབས་དེར་རེ་ཞིག་རྫོགས་པར་སྟོན་པས་ན་རྫོགས་ཚིག་ཀྱང་ཟེར་རོ།།

སློབ་ཚན་འདིའི་སྡོམ་ཚིག

གོ་ངོ་དོ་ནོ་བོ་མོ་འོ།།

རོ་ལོ་སོ་ཏོ་སླར་བསྡུ་ཡིན།།

རྗེས་འཇུག་རང་དང་ད་དྲག་ཏོ།།