སློབ་ཚན་བདུན་པ། འདོགས་ཅན་གྱི་ཡི་གེ་བཤད་པ།

གསལ་བྱེད་སུམ་བཅུའི་ནང་ནས་ཡ་ར་ལ་ཝ་བཞི་ནི་འདོགས་ཅན་གྱི་ཡི་གེ་ཡིན། འདོགས་ཅན་གྱི་ཡི་གེ་ཟེར་དོན་ནི། མིང་གཞིའི་ཡི་གེ་རྣམས་ལ་སྨད་ནས་ཡར་ལ་འདོགས་པའི་ཚུལ་གྱིས་འཇུག་པས་ན་འདོགས་ཅན་གྱི་ཡི་གེ་ཟེར། དེ་ལ་ཡ་བཏགས་ཅན་གྱི་ཡི་གེ་བདུན་ཡོད་དེ། ཀྱ་ཁྱ་གྱ་པྱ་ཕྱ་བྱ་མྱ་བཅས་ཡིན། དེ་རྣམས་དོན་ལ་འཇུག་ཚུལ་ནི། དཔེར་ན། ཀྱེ་མ། ལུག་ཁྱུ། གྱོད་གཞི། དཔྱད་གཞི། ཁ་ཕྱོགས། བྱ་བ། མྱུར་མོ་ཞེས་པ་ལྟ་བུའོ།།

ར་བཏགས་ཅན་གྱི་ཡི་གེ་བཅུ་གཉིས་ཡོད་དེ། ཀྲ་ཁྲ་གྲ་ཏྲ་ཐྲ་དྲ་པྲ་ཕྲ་བྲ་མྲ་སྲ་ཧྲ་བཅས་ཡིན། དེ་རྣམས་དོན་ལ་འཇུག་ཚུལ་ནི། དཔེར་ན། བཀྲ་ཤིས། ཁྲོམ་ཆེན། རལ་གྲི། པ་ཏྲ། ཐྲིག་སྒྲ། དྲང་མོ། པྲོག་ཟེ། འཕྲིན་ཡིག ཕོ་བྲང་། ཨ་མྲ། སྲང་ལམ། ཧྲིལ་པོ་ཞེས་པ་ལྟ་བུའོ།།

ལ་བཏགས་ཅན་གྱི་ཡི་གེ་དྲུག་ཡོད་དེ། ཀླ་གླ་བླ་ཟླ་རླ་སླ་བཅས་རྣམས་ཡིན། དེ་རྣམས་དོན་ལ་འཇུག་ཚུལ་ནི། དཔེར་ན། ཀླད་པ། གློག་སྒྲོན། བླ་བྲང་། ཟླ་བ། རླབས་ཆེན། སླ་མོ་ཞེས་པ་ལྟ་བུའོ།།

ཝ་བཏགས་ཅན་གྱི་ཡི་གེ་བཅུ་གཉིས་ཡོད་དེ། ཀྭ་ཁྭ་གྭ་ཉྭ་དྭ་ཚྭ་ཞྭ་ཟྭ་རྭ་ལྭ་ཤྭ་ཧྭ་བཅས་རྣམས་ཡིན། དེ་རྣམས་དོན་ལ་འཇུག་ཚུལ་ནི། དཔེར་ན། ཀྭ་ཡེ། ཁྭ་ཏ། གྭ་བ། ཉྭ་སྟི། དྭ་ཕྲུག ཚྭ་ཁུ། ཞྭ་མོ། ཟྭ་ཚོད། ཤྭ་འོད། རྭ་ཅོ། ཧྭ་ཤང་། ལྭ་བ་ཞེས་པ་ལྟ་བུ་དང་། གཞན་ཡང་སློབ་གྲྭ། རྩྭ་ཐང་། ཕྱྭ་གཡང་ལྟ་བུ་ག་ལ་ར་བཏགས་དང་། ཙ་ལ་ར་མགོ ཕ་ལ་ཡ་བཏགས་བྱུང་བའི་སྐབས་སུ་ཝ་བཏགས་འཇུག་པའི་སྐབས་ཀྱང་ཡོད་པ་ཤེས་དགོས།

སློབ་ཚན་འདིའི་སྡོམ་ཚིག

འོག་ན་གདན་ལྟར་མཛེས་པ་ཡི།།

ཡ་ར་ལ་ཝའི་འདོགས་བཞིའོ།།

ཡ་བཏགས་བདུན་དང་ར་བཏགས་ནི།།

བཅུ་གཅིག་ལ་བཏགས་ཡི་གེ་དྲུག།

ཝ་བཏགས་ཡི་གེ་བཅུ་གཉིས་ཏེ།།

ག་ལ་ར་བཏགས་འདོགས་པ་དང་།།

ཙ་ལ་ར་མགོ་ཕ་ཡིག་ལ།།