སློབ་ཚན་དྲུག་པ། མགོ་ཅན་གྱི་ཡི་གེ་བཤད་པ།
གསལ་བྱེད་སུམ་ཅུའི་ནང་ནས་ར་ལ་ས་གསུམ་ནི་མགོ་ཅན་གྱི་ཡི་གེ་ཡང་ཡིན། དེ་ལ་མགོ་ཅན་གྱི་ཡི་གེ་ཟེར་དོན་ནི་མིང་གཞིའི་ཡི་གེ་ལུས་ལྟ་བུ་དེའི་ཐོག་ར་ལ་ས་གསུམ་གྱི་མགོ་ཅན་བརྩེགས་ནས་ཡོད་པས་མིང་དེ་ལྟར་བཏགས་པ་ཡིན། དེ་ལ་ར་མགོ་ཅན་གྱི་ཡི་གེ་བཅུ་གཉིས་ཡོད་དེ། རྐ་རྒ་རྔ་རྗ་རྙ་རྟ་རྡ་རྣ་རྦ་རྨ་རྩ་རྫ་བཅས་ཡིན། དོན་ལ་འཇུག་ཚུལ་ནི། དཔེར་ན། ཆུ་རྐ། བྱ་རྒོད། རྔ་མོང་། རྗེས་འཇུག རྙིང་པ། རྟ་མཆོག རྡོ་རིང་། རྣ་བ། རྦ་རླབས། རྨ་ཆུ། རྩེ་མོ། རྫ་རི་ཞེས་པ་ལྟ་བུའོ།།
ལ་མགོ་ཅན་གྱི་ཡི་གེ་བཅུ་ཡོད་དེ། ལྐ་ལྒ་ལྔ་ལྕ་ལྗ་ལྟ་ལྡ་ལྤ་ལྦ་ལྷ་བཅས་ཡིན། དོན་ལ་འཇུག་ཚུལ་ནི། དཔེར་ན། ལྐོག་ཏུ། ལྒང་བུ། ལྔ་བཅུ། ལྕེ་རྩེ། ཡུལ་ལྗོངས། ལྟད་མོ། ལྡུམ་རྭ། སྟག་ལྤགས། ལྦ་བ། ལྷ་མོ་ཞེས་པ་ལྟ་བུའོ།།
ས་མགོ་ཅན་གྱི་ཡི་གེ་བཅུ་གཅིག་ཡོད་དེ། སྐ་སྒ་སྔ་སྙ་སྟ་སྡ་སྣ་སྤ་སྦ་སྨ་སྩ་བཅས་ཡིན། དོན་ལ་འཇུག་ཚུལ་ནི། དཔེར་ན། སྐེད་པ། སྒལ་པ། སྔ་དྲོ། སྙན་མོ། སྟ་རེ། སྡོང་པོ། སྣ་ཁུང་། སྤང་རྒྱན། སྦལ་པ། སྨན་པ། བཀའ་བསྩལ་ཅེས་པ་ལྟ་བུའོ།།
སློབ་ཚན་འདིའི་སྡོམ་ཚིག
སྟེང་ན་ཞྭ་ལྟར་མཛེས་པ་ཡི།།
ར་ལ་ས་ཡི་མགོ་ཅན་སྟེ།།
ར་མགོ་ཅན་པ་བཅུ་གཉིས་དང་།།
ལ་མགོ་ཅན་གྱི་ཡི་གེ་བཅུ།།
ས་མགོ་ལྡན་པ་བཅུ་གཅིག་གོ།
