ཤིན་ཧྭ་གསར་འགྱུར་ཁང་ལྷ་ས་ནས་གློག་འཕྲིན་འབྱོར་པ་གཞིར་བཟུང། འཛམ་གླིང་ཐོག་གི་གྲོག་རོང་ཆེ་ཤོས་སྟེ་ཡར་ཀླུང་གཙང་པོའི་གྲོག་རོང་ཆེན་པོར་ཡུལ་སྐོར་མཛེས་ལྗོངས་ཁུལ་ཧ་ཅང་ཆེ་གྲས་ཤིག་སྐྲུན་བཞིན་ཡོད་པ་རེད། སྔོན་དཔག་བྱས་ན་༢༠༡༠ལོར་སླེབས་སྐབས་གངས་རིར་ལྟ་སྐོར་དང་། གྲོག་རོང་དུ་གོམ་བགྲོད་བྱེད་པ། ཆུ་ཚན་དུ་གུང་གསེང་གཏོང་བ་སོགས་གཞི་གཅིག་ཏུ་གྱུར་བའི་ཡར་ཀླུང་གཙང་པོའི་གྲོག་རོང་ཆེན་པོའི་མཛེས་ལྗོངས་ཁུལ་བསྐྲུན་གྲུབ་པ་བྱ་རྒྱུ་རེད།
གསར་འགོད་པས་མཛེས་ལྗོངས་ཁུལ་གསར་སྤེལ་དོ་དམ་གྱི་འགན་འཁུར་མཁན་བོད་ལྗོངས་ཡུལ་སྐོར་མ་རྐང་ཚད་ཡོད་ཀུང་སི་ནས་ཤེས་རྟོགས་བྱུང་བར་གཞིགས་ན། ༢༠༠༥ལོ་ནས་བཟུང་ཀུང་སི་དེས་ཡར་ཀླུང་གཙང་པོའི་གྲོག་རོང་ཆེན་པོའི་མཛེས་ལྗོངས་ཁུལ་གསར་སྤེལ་བྱེད་འགོ་ཚུགས་པ་དང་མིག་སྔར་མ་དངུལ་སྒོར་ཁྲི༡༣༣༠བཏང་བའི་ཡར་ཀླུང་གཙང་པོའི་ཆུ་ཐོག་འགྲུལ་ལམ་གྱི་ཡུལ་སྐོར་རྣམ་གྲངས་འཁོར་སྐྱོད་བྱེད་འགོ་ཚུགས་ཡོད།
འདི་ལོ་མ་དངུལ་སྒོར་དུང་ཕྱུར༣.༥བཏང་ནས་ཡུལ་སྐོར་བའི་སྣེ་ལེན་ལྟེ་བ་དང་། ཕད་གྲོང་རྡལ་གྲུ་ཁ། གནམ་ལྕགས་འབར་བ་མཛེས་ལྗོངས་ལྟ་སྟེགས་སོགས་ཚུད་པའི་ཡར་ཀླུང་གཙང་པོའི་གྲོག་རོང་ཆེན་པོའི་འཇུག་སྒོའི་མཛེས་ལྗོངས་ཁུལ་གྱི་འཛུགས་སྐྲུན་རྣམ་གྲངས་ལས་མཇུག་འགྲིལ་ཟིན་པས་སྐུ་མགྲོན་རྣམས་བག་ཕེབས་ངང་ཆུ་དང་སྐམ་ས་གཉིས་བརྒྱུད་གྲོག་རོང་ཆེན་པོའི་ནང་སྐྱོད་ཆོག་པ་དང་གནམ་ལྕགས་འབར་བ་སོགས་འཛམ་གླིང་རིམ་པའི་མཛེས་ལྗོངས་ཁུལ་ལོངས་སུ་སྤྱོད་རྒྱུ་ཡོད།
ཕྱི་ལོར་མཛེས་ལྗོངས་ཁུལ་དུ་ད་དུང་སྐར་བཞི་རིམ་པའི་ཚད་ལྡན་མགྲོན་ཁང་དང་། ཡུལ་སྐོར་བའི་ཟ་ཁང་ཆེན་མོ། སྨན་གླིང་གནམ་ཐང་། དགེ་དགའ་ཆུ་ཚན་སོཊ་ལས་གྲྭ་འཛུགས་སྐྲུན་བྱ་རྒྱུ་ཡིན་ཞིང་། སྲིད་གཞུང་ནས་མ་དངུལ་བཏང་བའི་མཛེས་ལྗོངས་ཁུལ་གྱི་ཟམ་ཆེན་དང་གཞུང་ལམ་ཡང་ལེགས་གྲུབ་ཡོང་རྒྱུ་རེད།
