རྒྱལ་པོ་ལོ་གསར་ནི་བོད་ཟླ་དང་པོའི་ཚེས་གཅིག་ནས་ཡིན་ཞིང་། ལོ་གསར་འདིའི་བྱུང་ཚུལ་ནི་དུས་རབས་བཅུ་གསུམ་པའི་དུས་མགོར་ཧོར་ཇིང་གིར་གྱི་རྒྱལ་པོས་བོད་ལྗོངས་དབང་དུ་བསྡུས་རྗེས་རྒྱ་ནག་གི་ཧོང་ལེ་དང་བོད་ཟླ་དང་པོ་མཐུན་པར་བརྟེན་ཧོར་ལུགས་ལྟར་བོད་ཟླ་དང་པོར་ཧོར་ཟླ་དང་པོ་ཞེས་བཏགས། སྐབས་དེར་ས་སྐྱའི་ལོ་ཐོ་ལྟར་ཧོར་ཟླ་དང་པོའི་ཚེས་གཅིག་ལ་རྒྱལ་པོ་ལོ་གསར་ཞེས་པའི་ཐ་སྙད་བཏགས། སྐབས་དེར་ས་སྐྱའི་ལོ་ཐོ་ལྟར་ཧོར་ཟླ་དང་པོའི་ཚེས་གཅིག་ལ་རྒྱལ་པོ་ལོ་གསར་ཞེས་པའི་སྲོལ་དར་བ་དེ་དག་བོད་ཁྲི་སྐོར་བཅུ་གསུམ་དུ་གཏོགས་པ་ཚང་མས་ལོ་གསར་དུས་སྟོན་དུ་བྱེད་ཅེས་བྱམས་པ་རྒྱལ་མཚན་ལགས་ནས་བྲིས་པ་གནང་བའི་ ༼བོད་སྔ་རབས་ཀྱི་མཛད་ཆེན་དང་དུས་སྟོན་ཁག་གི་གཏམ་ངོ་མཚར་ཅན་གྱི་ལྟད་མོ༽ ཞེས་པ་ཞིག་༡༩༨༩ལོའི་ལྷ་ས་སྐྱིད་ཆུ་ཞེས་པའི་དུས་དེབ་དང་པོར་འཁོད་པ་ལྟར་རྒྱལ་པོ་ལོ་གསར་ཞེས་པའི་མིང་དེ་སྐབས་དེ་ཙམ་ལ་ཐོག་པར་ངེས་ཀྱང་ལོ་གསར་གཏོང་སྲོལ་གྱི་ཟླ་དུས་ཚེས་གྲངས་དེ་ནི་སྐབས་དེར་ཐོག་མར་བྱུང་བར་བརྗོད་དཀའ་སྟེ་བོད་དུ་ལོ་འགོ་རྩི་སྟངས་མི་འདྲ་བ་དུ་མ་ཡོད་པ་ལས་དབུས་གཙང་ཁུལ་དུ་ཟླ་བ་དང་པོར་ལོ་འགོ་བརྩི་བ་ཡང་ཧོར་ལུགས་ཁོ་ན་མིན་པའི་ཤོད་སྲོལ་ཞིག་ཀྱང་སྣང་ཡང་ཡིད་བརྟན་འཕེར་ངེས་ཀྱི་ཡིག་ཆ་སོགས་ད་བར་མ་རྙེད་པས་ཐག་ཆོད་པ་ནི་བརྗོད་དཀའ་བ་ལགས་ཤིང་ལོ་གསར་འདི་ནི་རྒྱས་སྤྲོས་ཆེ་ཆུང་ཙམ་མ་གཏོགས་མདོ་སྟོད་སྨད་དང་། དབུས་གཙང་སོགས་ཧ་ལམ་བོད་རིགས་གནས་པའི་ས་ཁུལ་ཡོངས་རྫོགས་ཀྱིས་དགའ་སྟོང་བྱེད་པའི་ལོ་གསར་ཞིག་ཡིན། ལྷ་ས་དང་། ལྷ་སའི་ཉེ་འཁོར་གྱི་རྫོང་ཁག་ལས་སྙེ་མོ་དང་ཆུ་ཤུར་རྫོང་ཁོངས་ཤེལ་གྲོང་སོགས་ལུང་པ་ཁག་གཅིག་མ་གཏོགས་གཞན་སྟོད་ལུང་སོགས་རྫོང་ཁག་རྣམས་དང་། ནག་ཆུའི་ས་ཁུལ་མང་ཆེ་བ། ལྷོ་ཁ་ཁུལ་བཅས་ནི་རྒྱལ་པོ་ལོ་གསར་ཁོ་ན་ལས་སོ་ནམ་ལོ་གསར་གཞན་རྣམས་གཏོང་མཁན་ཉུང་ཉུང་ཡིན།
