བོད་ཟླ་༡༢ཚེས་གཅིག་ཉིན་གཏོང་བའི་ལོ་གསར་དེའི་བྱུང་ཚུལ་ནི། ༼བོད་སྔ་རབས་ཀྱི་མཛད་ཆེན་དང་དུས་སྟོན་ཁག་གི་གཏམ་ངོ་མཚར་ཅན་གྱི་ལྟད་མོ༽ ཞེས་པ་ལས་དུས་རབས་བརྒྱད་པ་ཁྲི་སྲོང་སྡེ་བཙན་གྱི་དུས་བོན་ཆོས་ཉམས་པ་དང་ཕྱོགས་མཚུངས་སུ་གྱིམ་ཤིང་ཀོང་ཇོའི་དུས་བོད་དུ་བསྒྱུར་བའི་རྩིས་ཀྱི་དཔེ་ཆ་སྟེ་བར་འགྱུར་གསལ་སྒྲོན་སྦས་བཅས་ཅན་གྱི་ལུགས་ཞེས་བོད་ཟླ་༡༢ཚེས་༡ལ་རྒྱ་ནག་གི་སོ་ནམ་ལོ་གསར་འཁེལ་བ་དང་ལྷན་དུ། བོད་ཀྱི་ལོ་གསར་སྲོལ་ཆགས་པ་དེ་གནའ་སྲོལ་དང་ཀོང་ཇོ་ཕྱི་མའི་ལུགས་ཞེས་གསལ་བ་ལྟར་ཀོང་ཇོ་ཕྱི་མ་སྟེ་གྱིམ་ཤིང་ཀོང་ཇོའི་དུས་དུ་བྱུང་བའི་ལོ་གསར་གཏོང་སྲོལ་ཡིན་པ་དང་། ལོ་གསར་གཙང་ཕྱོགས་ཀྱི་ཡུལ་གྲུ་ཕལ་ཆེ་བ་དང་སྟོད་མངའ་རིས་ཁུལ་གྱི་བྱང་ཐང་འབྲོག་པ་སོགས་ཀྱིས་ཤིན་ཏུ་རྒྱས་པོ་གཏོང་སྲོལ་ཡོད། གོང་གསལ་ཡུལ་གྲུ་དེ་དག་གིས་སོ་ནམ་ལོ་གསར་རྒྱས་པོ་གཏོང་བ་མ་ཟད། རྒྱལ་པོ་ལོ་གསར་ཏེ་ཟླ་བ་དང་པོའི་ལོ་གསར་ཡང་རྟེན་འབྲེལ་མ་འཆུགས་ཙམ་གཏོང་སྲོལ་ཡོད་པ་རེད། མངའ་རིས་ཁུལ་དུ་ཟླ་བ་༡༢པའི་ལོ་གསར་གཏོང་སྲོལ་གྱི་སྐོར་ལ་བོད་ལྗོངས་མི་དམངས་དཔེ་སྐྲུན་ཁང་ནས་བཀྲམ་པའི་ ༼ཞང་ཞུང་སྲིད་པའི་གྲེ་འགྱུར༽ ཞེས་པ་དང་། བོད་དམག་ཁུལ་ཁང་གི་པར་འདེབས་བཟོ་གྲྭ་ནས་༡༩༩༥ལོར་དཔེ་སྐྲུན་བྱས་པའི་ ༼རུ་ཐོག་ཁྱུང་རྫོང་དཀར་མོའི་ལོ་གསར་དང་དུས་ཆེན་གཏོང་སྲོལ་སྐོར་ཆེ་ལོང་ཙམ་བརྗོད་པ༽ ཞེས་པའི་ཤོག་གྲངས་༩༣༣ནང་བྱང་ཐང་འབྲོག་པའི་ལོ་གསར་བོད་ཟླ་༡༡པའི་ཚེས་༢༩ཉིན་དགུ་ཐུག་བཏང་། དགུ་གཏོར་མེ་རོ་དབྱུགས་པ་བཅས་བྱེད། ཚེས་༣༠ཉིན་ཐབ་གཟན་ཟ་བ། ཟླ་༡༢པའི་ཚེས་༡ཉིན་ཞོགས་པ་སྔ་པོ་ནས་ནང་མི་རྒན་གཞོན་ཚང་མ་གཟབ་མཆོར་སྤྲད་ནས་རྒན་གྲས་ལ་གུས་ཕྱག་བྱེད་ཅེས་སོགས་གསལ་བར་གཞིགས་ན་མངའ་རིས་ཁུལ་དུ་འབྲོག་པ་ཁག་གཅིག་གིས་ཀྱང་སོ་ནམ་ལོ་གསར་འདི་གཏོང་གིན་ཡོད་པ་རྟོགས་ཐུབ།
