ཚེས་བཅོ་ལྔའི་ཉིན་མོ་ནི་མཆོད་པ་བཤམས་པའི་དུས་ཆེན་ཏེ་སྨོན་ལམ་ཆེ་མོའི་ནང་གི་དུས་ཆེན་ངོ་མཚར་ཆེ་ཤོས་ཤིག་ཡིན། ལྷ་སའི་བཅོ་ལྔ་མཆོད་པ་ཞེས་བརྗོད་ཅིང་སྲིད་གཞུང་དང་། བླ་བྲང་ཆེ་ཁག སྡེ་དཔོན་ཆེ་ཁག དེ་བཞིན་རྒྱུད་གྲྭ་སྟོད་སྨད་སོགས་ཁུངས་སོ་སོས་མཆོད་གཞུང་ནང་གསལ་ལྟར་ལྷ་སའི་བར་སྐོར་གྱི་ནང་དུ་མཆོད་ཁྲི་ཐོག་རྩེག་གསུམ་ཙམ་ཡོད་པའི་ཐོག་ཏུ་མར་ཚོན་ལས་གྲུབ་པའི་ངོ་མཚར་གྱི་ཞིང་བཀོད་ལྟ་ན་སྡུག་པའི་ནང་དུ་སྟོན་པ་སངས་རྒྱས་བཅོམ་ལྡན་འདས་ཀྱི་སྐུ་བརྙན་དང་། བྱང་ཆུབ་སེམས་པའི་སྐུ་བརྙན་སྣ་ཚོགས་དང་། དེ་བཞིན་རྒྱན་དྲུག་མཆོག་གཉིས་སོགས་ཀྱི་སྐུ་བརྙན་ཡོད་ལ་རྒྱལ་སྲིད་སྣ་བདུན་དང་། བཀྲ་ཤིས་རྟགས་བརྒྱད། ཚེ་རིང་རྣམ་དྲུག མཐུན་པ་སྤུན་བཞི། སྒེག་པའི་ཉམས་དང་ལྡན་པའི་མཆོད་པའི་ལྷ་མོ་སོགས་སྒྱུ་རྩལ་གྱི་ཉམས་འགྱུར་སྣ་ཚོགས་ལྡན་པའི་གཟུགས་བརྙན་ཡིད་དུ་འོང་ཞིང་། བཟོ་བཀོད་ཕུན་སུམ་ཚོགས་པའི་སྒྱུ་རྩལ་གྱི་བརྩམས་ཆོས་ཏེ་རྣམ་པར་བཀྲ་བའི་མཆོད་པས་བར་སྐོར་ཡོངས་སུ་འཁོར་ནས་ཡོད་པ་མ་ཟད། མཆོད་པ་མང་པོ་ཞིག་ནི་གསང་ཐག་འཐེན་ནས་འགུལ་རྒྱུ་ཡོད་པས་ངོ་མཚར་ཆེ་བའི་ལྟད་མོས་མི་རྣམས་ཀྱི་ཡིད་དབང་རབ་ཏུ་འཕྲོག་ཅིང་། མཆོད་པ་དེ་དག་གི་མདུན་དུ་སྐར་ཚོགས་གྲངས་མེད་ས་ལ་འཕོས་པ་ལྟ་བུའི་མར་མེའི་ཕྲེང་བས་རབ་ཏུ་བརྒྱན་ཅིང་འོད་མདངས་རྣམ་པར་བཀྲ་བ་ཞིག་ཡོད། ཏྰ་ལའི་བླ་མ་དང་། བཀའ་ཤག་གིས་གཙོས་དཔོན་རིགས་རྣམས་མཆོད་པའི་མཇལ་ཁ་མ་གྲུབ་བར་དུ་བར་སྐོར་ཕྱི་ལོག་ནས་ཡོང་སའི་སྲང་ལམ་ཡོངས་ལ་ཐག་རྒྱ་བཀྲམས་ཏེ་དམག་མིའི་སྲུང་བྱ་བསྡད་ནས་མང་ཚོགས་རྣམས་བར་སྐོར་ནང་དུ་མཆོད་མཇལ་དུ་གཏོང་གི་མེད། ཏྰ་ལའི་བླ་མ་དང་བཀའ་ཤག་མཆོད་གཟིགས་གྲུབ་མ་ཐག་ཐག་རྒྱ་གློད་དེ་རྒྱ་ཆེའི་མང་ཚོགས་རྣམས་འཚང་ཁ་བཤིག་བཤིག་གིས་མཆོད་པ་མཇལ་བཞིན་དུ་བར་སྐོར་དུ་འགྲོ་བ་དང་། ལྷ་སའི་ཉེ་འཁོར་གྲོང་གསེབ་གྲིབ་པ་དང་ར་མ་སྒང་པ་ཚོ་ནས་མཆོད་པ་རེ་རེའི་མདུན་དུ་སྒོར་གཞས་རེ་རྒྱག་བཞིན་དུ་བར་སྐོར་དུ་འགྲོ་ཞིང་། སྐབས་རེ་ནི་མཚན་གང་སྒོར་གཞས་བརྒྱབ་ནས་སྡོད་ཀྱི་ཡོད་པ་རེད།།
