བོད་ཟླ་བཅུ་པའི་ཚེས་ཉེར་ལྔ་ཉིན་ནི།     རྗེ་ཙོང་ཁ་པ་ཆེན་པོ་བློ་བཟང་གྲགས་པའི་དགོངས་རྫོགས་ཀྱི་དུས་ཚོད་ཉིན་མོ་ཞིག་རེད།     དེ་ཡང་ས་ཕག་སྤྱི་ལོ་༡༤༡༩ལོར་རྗེ་ཙོང་ཁ་པ་ཆེན་པོས་སྟོད་ལུང་དང་སེ་འབྲས་སོགས་སུ་ཕེབས་ནས་ཆོས་མང་དུ་གསུངས། མཐར་དགའ་ལྡན་དུ་ཕྱིར་ཕེབས་ཐོག་ཐུབ་དབང་ཚུལ་ཁྲིམས་མའི་སྐུ་མདུན་དུ་མཆོད་འབུལ་དང་།     བསྔོ་སྨོན་རྒྱ་ཆེ་མཛད་རྗེས་སྐུ་བེར་དང་།      དབུ་ཞྭ་སྲས་ཀྱི་ཐུ་བོ་དར་མ་རིན་ཆེན་ལ་གནང་སྟེ་རྒྱལ་ཚབ་ཏུ་བསྐོ་བཞག་མཛད་ནས་བོད་ས་ཕག་༡༤༡༩ཟླ་བཅུ་པའི་ཚེས་ཉེར་ལྔ་ཉིན་གཟིམ་ཁང་འོད་གསལ་སྦུག་ཏུ་གཤེགས།     སྤྱི་ལོ་༡༤༢༠ལོའི་ཟླ་བཅུ་པའི་ཚེས་ཉེར་ལྔ་ཉིན་དགའ་ལྡན་དུ་རྗེ་རིན་པོ་ཆེའི་དགོངས་རྫོགས་རྒྱ་ཆེ་སྨིན་སྒྲུབ་མཛད་པ་དེ་ནས་བཟུང་།     དགའ་ལྡན་ལྔ་མཆོད་ཞེས་རྒྱ་བོད་ཧོར་གསུམ་སོགས་ཀྱི་དད་ལྡན་སེར་སྐྱ་ཚང་མས་དགོངས་རྫོགས་མཆོད་འབུལ་རྒྱ་ཆེ་གཟབ་རྒྱས་གཤམས་ཏེ་རྣམ་དཀར་དགེ་ལས་ལ་བརྩོན་ཞིང་།    མར་དང་།    སྣུམ།    དཀར་ཞུན་བཅས་ཀྱི་མར་མེའི་ཕྲེང་བ་སྐར་ཚོགས་ས་ལ་འཕོས་པ་ལྟ་བུར་རྩེ་ཕོ་བྲང་དང་།     གཙུག་ལག་ཁང་།    སེ་འབྲས་དགའ་གསུམ།    རྒྱུད་གྲྭ་སྟོད་སྨད་སོགས་ལྷ་ཞོལ་དགོན་ཁག་དང་།    ཁྱིམ་མི་ཡོངས་ནས་རང་ཉིད་ཀྱི་འཁོས་འབྱོར་ལ་གཞིགས་ཏེ་མཆོད་སྤྲིན་རྒྱ་གང་ཆེ་བྱེད་པ་དང་།    རྒན་བྱིས་ཚང་མས་དམིགས་བརྩེ་མ་འདོན་པ་དང་།    དེ་ཉིན་དེ་སྔའི་ས་གནས་སྲིད་གཞུང་གི་དྲུང་རིགས་སེར་སྐྱ་ཡོངས་རྫོགས་རྩེ་ཕོ་བྲང་དུ་བཅར་ཐོག་དྲུང་ཇའི་སར་རྩེ་ཤོད་ཞབས་གསར་བཞི་ཙམ་གསར་མཇལ་ཞུ་ཞིང་།    དེ་ཉིན་ནས་བཟུང་དེ་སྔའི་ས་གནས་སྲིད་གཞུང་གི་དཔོན་རིགས་རྣམས་ན་བཟའ་དགུན་ཆས་བཞེས།    དྲུང་ཇ་གྲོལ་རྗེས་ཏྰ་ལའི་རིམ་བྱོན་གྱི་གསེར་གདུང་རིན་པོ་ཆེ་བཞུགས་པའི་མཆོད་ཁང་ཁག་ལ་ཕེབས་ནས་གསེར་གདུང་རེ་རེའི་མདུན་དུ་མཆོད་འབུལ་གནང་།    དགོང་དྲོ་ས་རུབ་མཚམས་བཀའ་ཤག་དང་།    ཤོད་སྐོར་ཚང་མ་གཙུག་ལག་ཁང་དུ་ཕེབས་ནས་དཀར་མེའི་མཆོད་གཟིགས་མཛད།    གོང་དུ་ལྷ་ས་དཔལ་ལྷའི་རི་ཁྲོད་དང་།    ཞོལ་པ་དགའ་ལྡན་ལྔ་མཆོད་ཅེས་བཤད་པ་ལྟར་དགའ་ལྡན་ལྔ་མཆོད་ཀྱི་ཉིན་མོ་དེར་རྩེ་ཞོལ་གྱི་གྲོང་མི་ཚོས་ལྷ་སའི་དགའ་ཉེ་རྣམས་སྐུ་མགྲོན་དུ་གདན་དྲངས་ནས་ཞལ་ལག་གཏོང་གི་ཡོད་པ་རེད།